راني القيتهم… قصيدة رثاء في ضحايا درنه في ليبيا

كتب عمر محمد
اتصل أخ بشقيقه يسأل عن أهله في درنه المدينة المنكوبة في ليبيا فرد عليه قائلاً..

راني القيتهم
و تحت الوطا بيدي ونا ورايتهم
نبي انطمنك يا خوي ..راني القيتهم

طمن بالك ..
القيت البنات وزوجتك واعيالك
حتى عمامك ، ماسكين خوالك
واللي قهرني ، راه ما عزيتهم
لكن ، اللي هون علي سوالك
من حسن حظي نا اللي لميتهم
ياخوي تمو في ا لظلا م الحالك
سبحان كي سخر الله حقيتهم
ندعي لربي ، بيه يلطف حالك
نشهد شهادة ، السموح عطيتهم

للشاعر عبدالسلام الفيتوري

صارت حوسه ..
وادي جرف مامن اللي مدسوسه
تمنيت ساعتها ، عصاته موسى
موج ايتلاطم ، فيه ماطقيتهم
ما لقيت لحظتها تراب اندوسه
ولا من سمعني وين ما ناديتهم
ما تلومني و اتقول لي مدروسه
نجيت روحك ليش ما نجيتهم
الهمني الله حسيت بالقطوسه
تبعتها ،، وصلت علالي بيتهم

وياخوي راني القيتهم

مشاركة عبدالله فؤاد معيوف

ريح بالك
أطمن عليهم ما ايحير اسوالك
لميتهم في قبر طول اقبالك
اللي فالكتيب كلهم حطيتهم
ونا كان حظي فالمصيبه سالك
ما تعبوني طول نا حقيتهم

راني القيتهم

ما اتخاف عليهم
في قبر واحد كي اتريد اتجيهم
اقرأ عليهم فاتحه تكفيهم
هذوم شهداء جتهم علي قيس نيتهم
ادعي غير فالجنه انتلاقو بيهم
راح بيتهم لكن الجنه بيتهم

راني القيتهم

مشاركة الشاعر منصف الياسر

عزانا واحد
كم من اوجيه فريح ربي باعد
خذاهم السيل اللى بموجه ساعد
وسط البحر خذهم و نا راعيتهم
جمله انتعزو مو امغير القاعد
فى وسط درنه يقهرو كى جيتهم

لا ما القيتهم
ولا شفتهم كي الناس لا واريتهم
اعزاز باعدو عالعين .. لا ما القيتهم

مشاركة الشاعر عبدالسلام عبدالله بالخير البلالي

فيهم طحت
واريتم في لارض ياما نحت
و لكن اتريد الحق هك ارتحت
وقتا ابيدي فالوطا واريتم
و مصدوم كان اتسال ما صرحت
علي ما بكيت الحق ما وفيتم
يا خوي تعذرني انكان برحت
ولا القيتني مستوه يالا بيتم
انكان عالبكاء مالدمع نين نزحت
اعزاز فارقو لكن الحق عطيتم
و هذا وجي يا خويا انكان افرحت
بعدهم اللي في الناس مسمح صيتم

لا ما القيتهم
و لا شفتهم كى الناس لا واريتهم
اعزاز باعدو عالعين ..لا ما القيتهم.