المسله الناقصة 

عمرك سألت نفسك ازاي الفراعنة عملوا المسلات بالشكل ده ، ازاي قدروا من قطعه حجر واحدة يصمموا مسلة بالطول و الحجم ده في منتهي الدقة و الابداع

الاجابة حتلاقوها في اسوان و تحديدا في موقع المسلة الناقصة في احد محاجر الجرانيت في جنوب اسوان

ايه حكاية المسلة الناقصة دي

الحكاية يا سيدي ان لغز بناء المصريين القدماء للمسلات استمر لحد سنة ١٩٢١ لحد ما تم اكتشاف المسلةالناقصة دي في احد محاجر اسوان و من هنا عرفنا ازاي الفراعنة كانوا بيعملو مسلاتهم ، كانوا بيستخرجوا المسلة نفسها كقطعه واحدة بعد نحتها من المحجر و بعدين ينقلوها و يبدأو النقش عليها

طب ليه اتسمت بالاسم ده

اتسمت كده عشان المسلة دي لم يكتمل بنائها او نحتها و لم يتم استخراجها من مكانها و ده بسبب شرخ موجود فيها و ظلت موجودة في مكانها لالاف السنين عشان تشهد علي عظمة المصريين القدماء

المسلة بيقولو انها بتعود لعصر الملكة حتشبسوت يعني من حوالي ٣٥٠٠ سنة ولو كان اكتمل استخراجها و بنائها كانت حتكون اكبر مسلة في التاريخ

وزنها حوالي ١١٦٨ طن وارتفاعها حوالي ٤٢ متر يعني لو افترضنا ان الرجل القوي قادر علي حمل وزن ٢٠٠ كيلو جرام مثلا فمعني كده اننا محتاجين حوالي ٦٠٠٠ رجل عشان يرفعوا المسلة دي من مكانها و ينقلوها و ده شيء خرافي جدا

المحير بقي ان المسلة دي من الجرانيت الوردي و ده نوع بيحتوي علي مادة الكوارتز بنسبة من ٢٠٪ الي ٨٠٪ و ده بيعني انه صخر شديد الصلابة و لا يمكن قطعه بالادوات و الالات التقليدية اللي كانت عند الفراعنة زي النحاس و البرونز و الديوريت

والسؤال هنا : ازاي قطعوها بالدقة دي و كأنها مقطوعه بالليزر و ازاي كانو بيخططوا لنقلها مع الوزن الضخم ده

الغاز المصريين القدماء لا تنتهي و منها لغز المسلة الناقصة لانها من الاثار اللي بتؤكد حقيقة واضحة ان اكيد كان في يوما ما تكنولوجيا متطورة في مصر القديمة ، تكنولوجيا مقدرناش نعرف كانت ايه و جايه منين