شيخ العرب همام
شيخ العرب همــام
مين فينا ما سمعش عن الإسم ده ؟!
-هو أخر حاكم لصعيد مصر اللي جمع قبائل الصعيد تحت راية وأحدة وحارب المماليك….
-إنهارده هعرفكم علي وأحد من أهم رجال الصعيد يلا بينا علي قنا ..
-الأسطورة همام بن يوسف أحمد بن محمد بن همام الهواري أتولد في قرية فرشوط في محافظة قنا سنة 1709 وتوفي سنة 1769
-وهو من قبيلة الهماميـة واللي بيقال أنها بيمتد نسبها للحسين بن علي حفيد الرسول صلى الله عليه وسلم
-قبائل الهواره كان أصلها في المغرب وكانت بتحكم هناك في عهد الدولة الفاطمية ولكنها جت مصر عشان تتولي إمارة الصعيد وهما قسمان حلف ونسب والحلف هوارة لقباً وليس نسباً..
-وفضلت تتوالي الولاية لحد الشيخ يوسف واللي بعد وفاته تولي أكبر أبنائه سناً من الذكور واللي أسمه همام واللي ورث ملك ومملكة الصعيد ..
-هو زي ما وصفه الجبرتي ف كتابه :
الجناب الأجل والكهف الأظل الجليل المعظم والملاذ المفخم الأصيل الملكي ملجأ الفقراء والأمراء ومحط رجال الفضلاء.
طيب أي حكايته الراجل ده …؟؟
-خليني أقولك يارفيق أنه أول ما تولي بدأ خطر المماليك يظهر وقدامه الصعيد منقسم ومشتت فـ بذكائه وحكمته يبدأ يوحد قبائل الصعيد من هوارة وأشراف وعرب وأقباط جمعهم علي قلب راجل وأحد يدافعوا عن خطر المماليك ويحموا الصعيد ويظهروا الحق وسجلوا أتفاقهم فـ وثيقة مازالت حتي الآن محفوظة عند قبيلة شيخ العرب همام وترجع لسنة 1746 م
-بعد ما وحد القبائل وبقي المسيطر على الصعيد بكامل ولاياته ال21 من أول المنيا لاسوان يبدأ شيخ العرب همام ف أنه يكون جيش كبير عشان يحمي بيه أهل الصعيد وكان عند جنوب كل ولاية بيسيب مجموعة من الجنود عشان تحميها و كمان أسس قلعة شيخ العرب همام لصد هجمات الأعداء على الصعيد واللي اكتشفتها البعثة المصرية الفرنسية في أول موسم ليها وتم الكشف عن جدران القلعة الضخمة دي واللي بتتميز بقربها من السلاسل الجبلية الغربية لنهر النيل وكانت القلعة مرتفعة عن القري والمنازل المحيطة ليها و بتحتوي مكان لتدريب الجنود والعديد من الحجرات والمضايف والمطابخ ومجموعة من المخازن
-هتقولي وهو جاب التكلفة الضخمة دي منين لكل ده؟!
-هقولك مستنساش يارفيق اني قولتلك انه ورث ملك ومملكة قبيلة الهمامية واللي كانت غنية جداً لدرجة ان الجبرتي في كتابه بيقول عنه أنه كان بيملك اكتر من 10 الآلاف ثور بخلاف السواقي والطواحن والابقار والماشيه وعدد ضخم جدا من مخازن الغلال
وعندي وثيقة يحتفط بها أهله حتي الآن موثقة من الباب العالي بتقول انه كان يملك حوالي 242 الف فدان
يعني اكتر من نص مساحة الأراضي المزروعة ف الصعيد ونظرا لإدارته الحكيمة والقوية بدأت أملاكه تتزايد بشكل كبير وبالذات ف السنوات الأخيرة قبل وفاته
-كان مطبق النظام الجمهوري في مملكة الصعيد وكان معروف عنه تقواه وتواضعه ف مكنش بيفرق ف المعاملة بين أبناء قبيلته وبين باقي أهل الصعيد
– ويقال انه وقف 20 فدان للانفاق على المساجد وأصلح مسجد عبد الرحيم القنائي في قنا
-كمان وزع أراضيه علي الفلاحين ف كان بيدي الفلاح الأرض اللي محتاجها ويبدأ انه يزرعها ويشتغل فيها وبعدين يبقي يسدد من المحصول
-بدأ كمان انه يأسس مجموعة من الدواوين لتنظيم العمل في مملكة الصعيد وكان بيباشر الحسابات وكل الأعمال والإدارة بنفسه
-وبكده يكون ضمن الاقتصاد والأحوال السياسية والاجتماعية وأرسي قواعد مملكة الصعيد من المنيا لاسوان
-بعدها يبدأ يبسط نفوذه ويناطح المماليك في بعض الاختصاصات في الوجه القبلي وولاياته ال21 واللي كانت بتؤول إدارتها لحاكم جرجا المملوكي
” صالح بك”
-واللي كان بيحكم بشكل صوري لكن الإدارة الفعلية كانت ف ايد شيخ العرب همام
-تفضل الأمور ماشيه تمام لحد ما نلاقي شخص اسمه “علي بك الكبير”
بيتطلع للحكم والمشيخة ف يساعده حاكم جرجا صالح بك وجيوش شيخ العرب همام وبالفعل تولي منصب شيخ البلد
-ولكن بنتفاجأ بعدها انه بينقلب وعايز ينفرد بالحكم ويكون هو القوي الأوحد المسيطر على الصعيد بكامل ولاياته ف يقتل حاكم جرجا ويدخل في عدة معارك مع جيوش شيخ العرب همام
-و يجيي علي بك ويبعت الرسول بتاعه
” محمد بك ابو الذهب” ومعاه حملة كبيرة جدا عشان يقضي على الشيخ همام وبخدعة من محمد أبو الدهب قدر انه يستميل
” الأمير إسماعيل بن عبد الله” ابن عم الأمير همام في صفه وخلاه يخون ابن عمه في مقابل زعامة هوارة
ولما عرف شيخ العرب همام بخيانة ابن عمه وقت الحرب وهزيمة جنوده قبل شروط محمد أبو الدهب
واللي كان من ضمنها انه حكمه يقتصر على منطقة برديس واللي كانت منطقة تركز الهمامية أو الهوارة وقبل الشروط دي شيخ العرب همام بعد خيانته
وخرج مقهور وحزين من مدينة فرشوط
-وبنعرف بعد كده ان بعد خروجه من فرشوط بيدخلها محمد أبو الدهب هو ورجاله ويقوم بنهب وسرقة المدينة بالكامل واخدوا كل حاجة فيها من أموال وكنوز وأسلحة واستولوا كمان علي ممتلكات وديار عائلة الهمامية
– ويقال انه بعد فترة قليلة من هزيمته مات غما وحزنا في نوفمبر 1769 ودفن بجوار الشيخ محمد الجالس احد الأولياء في جبانة في منطقة قمولا واللي بتحوي جثمان اكتر من 40 ولي دفن بعيد عن أهله ومنطقة حكمه وميلاده فرشوط
-بعد وفاته يبدأ يتفرق الأمراء وحلفائه ف منهم اللي سافر تركيا ومنهم اللي سافر الشام
*اما عن زوجته “صالحة” وأولاده
ف انجب 5 اولاد
درويش : واللي فشل في حكم القبيلة ولم يحسن الإدارى
شاهين وعبد الكريم : واللي اشتغلوا في الزراعة ويقال إن شاهين تم قتله علي يد مراد بك نظرا لبعض الخلافات أثناء الحملة الفرنسية 1799
وعبد الكريم مات بعده بفترة
-وكان عنده بنتين” شريفة” واللي تولت مع امها بعض من أراضي الهمامية
اما “فاطمة” الابنه التانية ف تزوجت من عثمان آغا ابن عم همام ووكيل أعماله في القاهرة
-مات الشيخ همام وهو سايبلنا سيرة طيبة يفتخر بيها أهله حتي الآن وأعمال عظيمة لمصر وأثار أعظم كمان
-ف غير قلعته الضخمة ف شيد مسجد أثري بيرجع لعام 1757 م زي ما مكتوب علي الاعتاب الخشبية للمسجد بنظام يعرف بحسابات الجُمُل
ودي طريقة هندسية في الكتابة بحيث انك بتعمل ربط بين الحروف والأرقام فلما تجمع الحروف بنظيرها من الأرقام هيديك تاريخ انشاء المسجد
-المسجد مازال قائم في فرشوط مكون من صحن أوسط مكشوف و4 أروقة يتبع طراز المسجد النبوي وصحنه نسخة من صحن الجامع الأزهر
مبني من طوب الأجر والحجر وده تأثير عثماني ف شارك في بناء المسجد ده عمال كانوا جايين من تركيا وقتها ويميز المسجد الزجاج الخشبي اللي بيحمل نص البردة
– والمسجد بيحتوي على ساعتين شمسيتين معلقين تحت قبة المسجد الزجاجية واللي بيحددوا مواعيد الصلاة عن طريق الضوء
-المسجد عمره اكتر من 262 سنة وهو تابع لوزارة الآثار واللي قامت بترميمه بشكل كامل بعد الزلزال اللي حصل في فترة التسعينات وهو مفتوح للمصلين لإقامة الصلاة فيه
طيب آخر حاجة هل نسل الهمامية كده انقطع؟!
لا يارفيق مازالت قبيلة الهمامية واحدة من أكبر قبائل الصعيد واللي بتحتفظ بكل ما يخص بطلنا العظيم شيخ العرب همام واللي منهم تولي منصب كبيرة ف وزارات مصر المختلفة
