حكاية مسلسل ارابيسك للكاتب عمر جودة ناجى

بقلم عمر جوده ناجى

نقلها. عبدالرحمن محمود

بمناسبة معرض الكتاب واللى فيه كتابى

( الحكاية الحقيقية لاشهر الاعمال الفنية) 

نقراء معا الحكاية الحقيقة لمسلسل ارابيسك 

أرابيسك 

الحكاية الحقيقية وسحر وكواليس حسن ارابيسك 

فى سنة من السنين وعمنا اسامة انور عكاشة ماشى فى خان الخليلى ومنه على وكالة القطن شاف محل “علي حمامه” للارابيسك راجل فنااااان جد عن جد واستمر فى مهنة الارابيسك وحافظت عائلة حمامه على الصنعه دي وطورتها وكان لازم من اللقا والقاعدة على القهوة عشان على حمامه يحكى لعمنا عن جدوده وعن صنعته اللى اشتغل فيها ١٨ جد له لحد جده حسن خليل اللى كان معلم فى مدرسة الالهامية ودى مدارس كانت تحت عين الحاكم العثمانى واللى خد كل صنايعية البلد عشان يعملوا شغل زى اللى فى مصر هناك فى تركيا حسن خليل جد على حمامه كان متخصص فى فن الارابيسك كان بيعمل شواهد قبور السلاطين من الارابيسك وابواب وشبابيك القصور وفضلت المهنه بتننقل من ايد لايد حتى عمه اخو ابوه كان صنايعى عمل باب قصر الدوبارة وباب قصر العروبة وعلى حمامه مكنش صنايعى مش معروف دا انطلب بالاسم وعمل شغل فى مدخل برج ايفل فى باريس وكان بيسافر يعمل شغله فى بيوت سلاطين وامراء الخليج شغل معلمه وبحق وحقيقي لكن الصنعه هتندثر وتضيع زى عدد كبير من الصناعات زى الطرابيش والسجاد اليدوى واى شغلانه بتحل محلها أله او مبيبقاش لها طلب عصرى خرج عمنا اسامه من المكان دا وهو محمل بامانة وبحكايا كتير ولانه استاذ التفاصيل مهديش باله غير لما كتب تحفته الفنيه ارابيسك 

طيب كتبنا مسلسل فيه كل حاجه تقريبا كتبنا مسلسل زى نفسه الشغلانه معمول ارابيسك بمزاج وشغل العاشق والمعشوق فيه مفيش احلى من كدا طب مين يمثل الدور دا مين هيكون حسن ارابيسك 

فى الاول كان عادل امام كل فترة يطلب من اسامه عمل يرجع بيه للدراما ولما اسامة كتب ارابيسك حصل تواصل بعادل امام كمرشح اول للعمل بس محصلش وفاق عادل امام طلب تعديلات وعمنا اسامه ظبط الكلام والحكاية ومش عايز اى تعديل فانسحب عادل امام واعتذر وهنا استاذ اسامه فكر فى احمد زكى اللى اعتذر وطلب تأجيل لانشغاله فى عمل وانبعت العمل للجان محمود عبدالعزيز اللى وافق فعلا لكن ظهر خبر فى الجرايد بعنوان سخيف شوية وهو محمود عبدالعزيز بديلا لعادل امام للمرة الثالثة محمود اتضايق اوى من الخبر دا وعشان كدا قال لا مش هاقدر اعمل الدور اللى عادل امام سابه عشان فى الاخر الدور يروح لحد العمدة وعمدة العمد كمان عمنا وعم عيالنا صلاح السعدنى اللى اخد الدور قراه واتمعن فيه اوى وقالهم ادونى شهر كدا اجهز نفسي للعمل دا قالوا له ماشي بس خد بالك الوقت ممكن يسرقنا واحنا عايزين نلحق رمضان اداهم الاوكيه واختفى صلاح السعدنى عدا شهر وشوية ايام محدش عارف يوصله والوقت خلاص ضرورى يبداو تصوير وفى الوقت المناسب دخل صلاح السعدنى على الاستاذ اسامة وهو ماسك فى ايده برواز ارابيسك وقاله ايه رايك فى الحته دى قاله حلوة اوى قاله انا اللى عاملها اتاريه طول الشهر راح سلم نفسه لعلى حمامه اللى حكى اسامه له عنه وقعد معاه فى ورشته ومحله يفهم ويتعلم ويعرف اسم كل حاجه لان كل صانعه ولها لغتها وقعد مع صبيان الورشه ع القهوة ومعاه على حمامه وتعايش معاهم وفهم دماغهم ولغتهم ونكاتهم وقاعدتهم الحلوة كمان ورجع معبأ بكل دا هو كمان واقترح على عمنا اسامه ان حسن لازم يكون شعره كبير كنيش وعنده كرش لان دا شخص منهزم داخليا بيحارب جواه طوال الوقت فمش معقول يكون عايق وبقصه او يكون مهتم بشكله ودا عجب الكاست كله وبدا تصوير العمل وبدا الشغل الحلو يتغزل حلقة ورا حلقة وحكاية جوه حكاية مش باقولكم الارابيسك فن العاشق والمعشوق ودى ثمة المسلسل كله هتلاقي الصنايعى حسن وزميله المهندس صنعه وعلم يركبوا سوا يطلعوا احلى شغل يختلفوا يتهد الشغل هتلاقوا دكتور برهان بيمثل الحداثة واستاذ وفائي بيمثل التاريخ والجذور لو اتفقوا يعملوا مستقبل ولو اختلفوا تنهد الدنيا ويحصل زلزال 

هتلاقوا حسن وعشقه وحبه لنورا بنت استاذ وفائي الدور اللى اكتشفت فيه لوسى نفسها من تانى طب اقف مع نفسك كدا هى دى لوسي الرقاصه اللى بتتكلم بكل ثقافة واتزان دى وهتلاقوا عشق بنت البلد توحيده له اللى عارفه قيمته بس لما تطلب منه تجيبه ارض تقوله فى وسط الحارة 

على ايه دا انت حتت نجار …نجار الطبالى احسن منك 

الماتش مش صغير دا كبير كبر حجم البلد لاول مرة فى تاريخ اى تتر يتكتب كدا 

وجوز اخته الشرير المنتصر بالله انت متخيل من قبل ما تتفرج بيقولك خد بالك جوز اخته رمضان الخضرى دا شرير ياعم طب سبنى استكشف مش يمكن يطلع طيب زى استاذ كمال ابو ريه …ياض باقولك شرير 

احنا واحنا بنتفرج ع المسلسل دا كان بديل عندنا لالف ليلة وليلة بس مفيهاش اساطير حسن بطل العمل بطل مهزوم انهزامى نفسه ضاعت من سنين من بعد ما خرج من جيشه واخد تلت رصاصات فى جسمه وبعدها جت اتفاقية السلام حسسته انه مكنش له لزوم ودا الخط اللى اخده الاستاذ اسامه فى مجمل اعماله لانه كان كاتب قومى ثورى وضد الاتفاقية سواء انت او انا او اى حد شافها كانت لابد منها وكل كاتب مبيكتبش غير قناعاته الشخصية حسن هنا هو صورة طبق الاصل من على البدرى فى الحلمية نسخة باهته من على لو ملقاش دعم والده ونسي وعاش ونسخه مخففة من حسن عز الرجال فى كتيبة الاعدام بس لو عاش موصوم بالخيانه هناك وبالفشل هنا القضية مش قضية بحث عن هوية مصر او هوية شخص دا يمكن كان فى زيزينيا انما هنا البحث كله عن نسخة قديمة من شخص انفلت من ايديه زمانه هتلاحظ تكرار كلمه ان دا مش زمن حسن النعمانى فى المسلسل هتلاحظ كمان تتر النهاية وهو عبارة عن ماشية حسن بالليل وحيد بجوار شباك مسجد ولابس جاكت جلد ودا كان معتاد لبسه عند كل صنايعيه التسعينات خصوصا وترنيحه ايدية يمين وشمال وحركة رجليه اللى بتزيح حجارة صغيرة ف الارض هو دا حسن النعمانى او حسن ارابيسك اللى ماشي عايز يفرد جناجته زى زمان لكن الزمان مش زمانه فبيعيش وخلاص يترنح بايديه ع اد مايقدر ويضرب الارض كل ما تجيله فرصه

الخلاصة 

ارابيسك حالة من الف حاله كل شخص فينا بيمر بيها ممكن تقول فاشل مهزوم لكن وانت بتقول كدا هتلاقيك بتقول لنفسك مكنش كدا من الاول او مكنش كدا زمان كلنا عندنا حنين للنسخة القديمة مننا كلنا احيانا بنعيش محلك سر بنضيع ونضيع ونتركن بس على قديمنا اللى كان اجمل مافينا واخيرا كلمات تتر النهاية 

ويرفرف العمر الجميل الحنون

ويفر، ويفرفر في رفة قانون

وندور، نلف ما بين حقيقة وظنون

وبين آسى هفاف وهفة جنون

ويرفرف العمر الجميل الحنون

***

دنياك سكك، حافظ علي مسلكك

وامسك في نفسك لا العلل تمسكك

وتقع ف خية تملكك، تهلكك

أهلك، يا تهلك دا انت بالناس تكون

ويرفرف العمر الجميل الحنون

***

إن درت ضهرك للزمن يتركك

لكن سنابك مهرته تفركك

وإن درت وشك للحياة تسبكك

والخير يجيك بالكوم وهمك يهون

ويرفرف العمر الجميل الحنون