عادات و تقاليد

كان عندنا في القرية والقري اللي جنبها

كان عندنا في القرية والقري اللي جنبها
أي زوجه تقول لأخو زوجها يا عمي حتى لو أصغر منها ب 20 سنه , و أخت الزوج اسمها عمّه , ده لا قهر ولا استعباد , دي مودة ومحبة .
كان عندنا في القرية.
أي راجل بشنب ملو هدومه يقول لأي ست أكبر منه يا خاله حتى لو ماتقربلهوش خاله فلانه , لو كان عندها ألف فدان يقول لها يا خاله ,
ولو بتبيع جرجير قدام الجامع يقول لها يا خاله .
كان عندنا في القرية
العم بيتقال له أبوك فلان , روح هات كذا من بيت أبوك فلان , اللي هو عمك , و الجد بيتقال له سيدي فلان و أي راجل عجوز بيتقال له يا سيدي
كان عندنا في القرية
الإبن حتى لو كان أستاذ في الجامعه يبوس إيد أبوه و أمه و عمه الكبير و خالته الكبيره , يوطي و يبوس ضهر إيدهم مش يبوس خدهم .
كان عندنا في القرية …
لو حد تعب البلد تتقلب , ولو حد مات كله يعزي و يجهز أكل للضيوف اللي جايين يعزو من بره البلد ( كل بيت يجهز أكل ) ,
و في الفرح كله يحضر من غير كارت دعوه , من غير قاعه , القرية بتبقى هي القاعه .
كان عندنا في القرية…
ناس بتصحى من الفجر تركّب العده عالحمار و تعلّقه في العربيه الكار و تربط البهايم في العربيه من ورا و صوت ماكينات الري يظهر مع صياح الديوك ,
و أرض عطشانه بتشرب و عصافير بتسبح ربنا .
كان عندنا في القرية…
لو ماشي وشايل حاجه بتتاكل جايبها من الارض لازم تعزم عالناس اللي بتقابلك , خد لك شوية بصل أخضر لسه بطينهم أهم , خدي لك كرنبه يا خاله .
كان عندنافي القرية…
ناس بتنام بعد العشا , إيديهم خشنه و مشققه , بينامو مهدودين و مبتسمين ,
لا سمعو عن أمراض نفسيه ولا يعرفو المنوم و لا المهدئات ولا لعنو الظروف ولا الدكتور قال لهم محتاجين تطلعو شرم أسبوع عشان تغيرو جو .
كان عندنا في القرية…
ضحكه بتطلع من القلب و كلام حلو , صباحك نادي , خلّي عنك , العوافي , من يد ما نعدمهاش .
كان عندنا في القرية..
وشوش بتعرف تبتسم و عواجيز في ملامحهم خريطة بلد , و عيال صغيره بتاخد الحكمه والفلسفه من القاعده مع الاجداد ( لما بيقعد مع سيده ) , مش من كتب ( الخواجات ) .
كان عندنا في القرية…… كان
أدب و خجل و توقير للكبير و فيها حياه , حاجات كتير اختلفت بس لسه فيها حياه ,
الله يخرب بيت المدنية علي التطور على أم عوجة اللسان على بليز على ميرسي علي الماكياج و الماسكات و الوشوش.
يرحم زمااان وليالي زماان

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى