تاريخ ومزارات
لأول مرة من 3000 سنة طريق الكباش يظهر للنور
لأول مرة من 3000 سنة طريق الكباش يظهر للنور
الطريق بيربط معبد الأقصر بمعبد الكرنك اتنفذ في عهد الملك امنحوتب الثالث اللي اتسم عهده بالرخاء والرفاهية المبالغ فيها لدرجة ان ملوك المنطقة كانوا يبعتوله يطلبوا منه بعض الذهب عشان يزينوا بيه قصورهم وفي المقابل استطاع امنحوتب التالت انه يوسع الامبراطورية المصرية لاقصى اتساع ليها في التاريخ بدون اراقة نقطة دماء واحدة
من كنوز الملك توت عنخ امون اللي هو حفيد امنحوتب الثالث نقدر نتعرف على بعض سمات العصر ده لما كل الذهب ده كان مقتنيات طفل عنده 19 سنة فما بالك كانت الحياة عامله ازاي وقتها
الطريق كان له اسمين الاول (وات نثر) يعني طريق الرب و (تا مي رهنت) يعني طريق الكباش وده لأن الطريق كله مزين بتماثيل على هيئة كباش في وضعية ابو الهول والكبش هنا بيرمز للاله امون
اول مين اكتشف الطريق ده كان الدكتور زكريا غنيم سنة 1949 كان بينقب و عثر على 14 كبش وبعدها دكتور محمد عبدالرازق في الستينات عثر على 64 كبش و سنة 2002 دكتور محمد الصغير توصل الى ان ده طريق كامل طوله 2.7 كم مزين بـ1200 كبش وقدر يحدد مسار الطريق لكن اغلبه كان تحت الارض وفيه نجع (ابو عصبة) مبني عليه وانه يتم ازالته عايز اراده سياسية حقيقية وفضل من وقتها احياء طريق الكباش مجرد حلم
لحد من سنتين ما رجع المشروع للنور من تاني وفعلا تم ازالة مئات المباني من النجع واستعادة الطريق وترميم الكباش وخلال اسابيع قليلة هيتم افتتاحه في احتفالية مهيبة نتمنى انها لا تقل عن احتفالية موكب المومياوات الملكية .
